Nov 29, 2025
नेपाल उद्योग वाणिज्य महासंघको खेलकुद तथा मनोरन्जन फोरमको संयोजनमा महासंघ र राष्ट्रिय कलाकारहरु बीचको मैत्रीपूर्ण फुटसल प्रतियोगिता सम्पन्न भएको छ ।
बालुवाटारस्थित ढुकु फुटसल मैदानमा आयोजना गरिएको सो खेल महासंघको टोलीले कलाकारको टोलीलाई चार गोलका विरुद्ध सात गोल गरेको थियो ।
सो खेलको समुदघाटन महासंघका अध्यक्ष चन्द्र ढकालले रिबन काटेर गरेलगतै महासंघ कार्यसमिति पदाधिकारी र कलाकार बीच १० मिनेटको मैत्रीपूर्ण खेलपश्चात प्रतियोगिता शुरु भएको थियो । खेलको पहिलो सत्रमामहासंघले कलाकार टोलीलाई ३–० अन्तरको दवावमा राखेपनि दोश्रो सत्रमा कलाकारका तर्फबाट ३–३ को बराबरीपछि खेल रोमान्चक बनेको थियो । महासंघको टोलीले थप ४ र कलाकार टोलीले थप १ गोल गरेपछि एक घण्टाको सो मैत्रीपूर्ण खेल ७–४ अंकमा सकिएको थियो ।
खेल उद्घाटन गर्दै महासंघ अध्यक्ष चन्द्र प्रसाद ढकालले खेल केवल प्रतिष्पर्धाका लागि मात्र नभई आपसी मित्रता र सहकार्यको राम्रो अवसर भएको बताउनु भयो । शुरुको मैत्रीपूर्ण खेल भने ०–० मा सकिएको थियो ।
खेलमा महासंघका तर्फबाट अध्यक्ष चन्द्र ढकाल , उपाध्यक्षद्वय हेमराज ढकाल ज्योत्सना श्रेष्ठ, कोषाध्यक्ष भरतराज आचार्य तथा कलाकारहरुको टोलीमा शिव श्रेष्ठ, धिरेन शाक्य, रबिन्द्र खड्का, मोहन निरौला, लगायतको सहभागिता थियो ।
उद्योगी व्यवसायी र कलाकार बीचको मित्रता तथा सद्भावलाई थप प्रभावकारी बनाउन मैत्रीपूर्ण प्रतियोगिता आयोजना गरिएको र नेपालमा वरिष्ठ कलाकारहरुको सहभागिताले खेल रोमाञ्चक तथा सफल भएको कार्यक्रम संयोजक महासंघका खेलकुद तथा मनोरन्जन फोरमका अध्यक्ष हरि बहादुर कार्कीले बताउनु भयो । सहभागी खेलाडीलाई महासंघका अध्यक्ष ढकालले मायाँको चिनो प्रदान गर्नु भएको थियो ।
