Jul 27, 2023
नेपाल उद्योग वाणिज्य महासंघका अध्यक्ष चन्द्र प्रसाद ढकालले सदस्यहरूको बलियो संजाल र एकताबाटै महासंघ बलियो हुने बताउनु भएको छ ।
महासंघको वस्तुगत परिषदले मंगलवार आयोजना गरेको एक कार्यक्रमलाई संवोधन गर्नुहुदै अध्यक्ष ढकालले कतिपय अवस्थामा एक्लो प्रयासमात्र पर्याप्त नहुने हुंदा व्यवसायिक सहकार्य र एकताबाट मात्र सफलता मिल्ने धारणा उहांको थियो ।
वस्तुगत संघका नवनिर्वाचित पदाधिकारीहरुको सम्मानमा महासंघले राखेको कार्यक्रममा नवनिर्वाचित टिमलाई बधाई सहित कार्यकालको सफलताको शुभकामना दिनुहुदै अध्यक्ष ढकालले व्यवसायिक गतिविधि बढाउन सदस्य वस्तुगत संघहरूले निर्वाह गरेको नेतृत्वदायी भूमिकाको प्रशंसा गर्नुभयो ।
हाम्रा सदस्य वस्तुगत संघहरू महासंघका बलिया खम्वा हुन । आफै सक्षम पनि छन् । तपाईहरू आफना मुद्दाहरूलाई आफै पनि अगाडि बढाउन सक्नुहुन्छ तर कतिपय अवस्थामा एक्लो प्रयासले मात्र पनि सफलता नमिल्न सक्छ, अध्यक्ष ढकालले भन्नुभयो–तपाईहरूका इस्यूका साथमा महासंघपनि संगै गयो भने हाम्रो एकता अझ बढी मजुवुद हुन्छ हामीले हाम्रा समस्या समाधानमा सफलता पाउन सक्छौं ।
सो कार्यक्रममा उहांले नेपाल शैक्षिक परामर्श संघ, नेपाल गलैचा उत्पादक तथा निकासीकर्ता संघ, नेपाल कफी व्यवसायी महासंघ, नेपाल मैदा उद्योग संघ, नेपाल रत्न तथा आभुषण संघ, नेपाल जग्गा तथा आवास विकास संघ, नेपाल मसलन्द तथा शैक्षिक सामग्री उद्योग संघ र नेपाल वनस्पती घ्यू तथा तेल उत्पादक संघका पदाधिकारीहरुलाई सम्मान सहित बधाई दिनुभएको थियो ।
कार्यक्रमलाई संवोधन गर्नुहुदै महासंघका वरिष्ठ उपाध्यक्ष अन्जन श्रेष्ठले नेपालको प्रमुख समस्या भनेको सही तथ्यांकको अभाव रहेकाले यसका लागि महासंघले काम गर्ने बताउनु भयो । वरिष्ठ उपाध्यक्ष श्रेष्ठले तथ्यांक उपलव्ध गराउने कार्यमा निजी क्षेत्रले पनि खुला भएर सहयोग गर्नुपर्नेमा जोड दिनु भयो ।
सदस्यहरुसंग नियमित रुपमा बसेर उनीहरुका इस्यूहरुमाथि छलफल गर्न र समस्या समाधानमा पहल गर्न महासंघका पदाधिकारीहरु हरेक दिन ३ बजे पछि महासंघमा जम्मा भएर काम गरीरहेको बताउंदै कुनै समस्या भयो, कुनै इस्यूहरु छन् भने महासंघमा आएर छलफल गर्न पनि उहांले आग्रह गर्नुभयो । सदस्यका समस्या समाधानमा महासंघको वर्तमान टिम पूर्ण रुपमा प्रतिवद्ध रहेको पनि उहांको बताउनुु भयो ।
सभापतिको आशनबाट वस्तुुगत परिषद्का सभापति एवं उपाध्यक्ष हेमराज ढकालले वस्तुुगत परिषद्ले नयां सोच र फरक ढंगले काम गर्न लागेको उहांले जानकारी गराउनुु भयो । महासंघका सवै सदस्य संघहरुसंग नजिकमा रहेर उनीहरुको कुरा सुुन्ने, इस्यूहरुमा छलफल गर्ने र आएको निचोडहरुलाई कार्यान्वयनका लागि सरकारमा पैरवी गर्ने राणनीति अनुसार काम भैरहेको उहांले बताउनुु भयो ।
परिषद्का सभापति ढकालले भन्नुु भयो, निर्यात, पर्यटन, कृषि, उर्जा लगायतका क्षेत्रलाई प्रवद्र्धन गर्न हाम्रो जोड रहने छ । कृषि उद्यम केन्द्रलाई डाटा बैंकको रुपमा विकास गर्ने काममा हामी आजैबाट लाग्छौं ।
उपाध्यक्ष ज्योत्सना श्रेष्ठले कार्यक्रममा आएका सुझाव अनुसार सहयोग गर्न महासंघ तयार रहेको विश्वास दिलाउनु भयो । उहांले भन्नु भयो, हरेक क्षेत्रमा समस्या छ, कच्चा पदार्थमा सहजता छैन, दिइएका छुट सुविधा हटाइएको छ, सहज होला भन्यो समस्या जहांको तही छ । सवै उद्यमी व्यवसायीहरुले समस्या भोग्नु परेको छ । यहांबाट जानकारीमा आएको इस्युहरुलाई सम्बन्धित निकायबाट संवोधन गराउन महासंघले सहयोग गर्छ । बजेट पनि हामीले सोचे अनुसार आएन । मौद्रिक नीति पनि त्यस्तै रहयो । आएका सुझावहरुलाई संवोधन गर्ने क्रममा सदस्य संघहरुसंगै रहेर लाग्ने प्रतिवद्धता समेत उहांले सो अवसरमा जनाउनु भयो ।
सो अवसरमा नेपाल जग्गा विकास संघका अध्यक्ष विदुर धमलाले घर जग्गा व्यवसायमा आएको संकटलाई नयां मौद्रिक नीतिले संवोधन गर्न नसकेको बताउनु भयो ।
नेपाल शैक्षिक परामर्श संघका अध्यक्ष शेषराज भट्टराईले शिक्षा मन्त्रालयले मन्त्रिपरिषद्मा पठाएको मस्यौदा शैक्षिक ऐनको दफा ६५ को ५ र ६ खारेज गरिनुपर्नेमा जोड दिनु भयो । शैक्षिक सेवामा धरौटी राख्नु पर्ने प्रावधानले यस पेशामा लागेका व्यवसायीलाई कस्ने काम गरेको वताउनु भयो ।
नेपाल मैदा उद्योग संघका अध्यक्ष कुमुद कुमार दुगडले सवैभन्दा ठूलो समस्या सही तथ्यांकको अभाव रहेको बताउनु भयो । नेपालमा उत्पादन हुने धान, गहुलगायतका उत्पादनका सही तथ्यांक नै सरकारबाट नपाएको गुनासो गर्दै सही तथ्यांकको जोहो गर्ने संयन्त्र विकासमा महासंघले अग्रसरता लिनुपर्ने सुझाव राख्नु भयो ।
नेपाल गलैचा उत्पादक तथा निर्यातक संघका अध्यक्ष ई. तेन्जिङ शेर्पाले विपन्न वर्ग र भिन्नरूपले सक्षम नागरिकले समेत काम पाएका गलैचा उद्योगले २०५४ सालदेखि पाउंदै आएको भ्याट छुट सुविधा यस वर्षको बजेटमा हटाइदा यो क्षेत्र अव थप जोखिममा पर्ने र उत्पादन लागत समेत बढ्ने बताउनु भयो । उहांले सरकारको यो निर्णयका कारण करिव ३० देखि ३५ प्रतिशतले कार्पेटको निर्यात घट्ने दावी पनि गर्नुभयो । उहांले सन् २०२६ मा ग्रेजुएशन नहुदै नेपालले गर्नुपर्ने तयारीमा अहिलेदेखिनै काम गर्नुपर्ने सुझाव राख्नुभयो ।
नेपाल कफी व्यवसायी महासंघका अध्यक्ष ओमनाथ अधिकारीले कफी उत्पादनमा अव ठूला लगानीकर्ता भित्रयाउन आवश्यक भैसकेको वताउनु भयो । अहिलेपनि पर्याप्त सम्भाव्यता हुंदाहुंदै पनि देशको मागलाई पुरा गर्न नसकिएकाले कृषकहरुले ससानो क्षेत्रमा गरेको उत्पादन पर्याप्त नभएको वताउनु भयो ।
नेपाल रत्न तथा आभुषण संघका अध्यक्ष सुमन मान ताम्राकारले रत्न आभुषणको व्यवसायमा लागेका व्यवसायीका लागि सुन प्रमुख कच्चा पदार्थ भएकाले सुनको कोटा प्रणाली खारेज गरि सर्वसुलभ तरिकाले आपूर्ति हुनुपर्ने सुझाव राख्नुभयो । अन्ततोगत्व उपभोक्तालाई मार पर्ने २ प्रतिशत विलासिता शुल्क पनि खारेज हुनुपर्ने धारणा उहांको थियो ।
नेपाल शैक्षिक सामग्री उत्पादक संघका अध्यक्ष निमनाथ फुयांलले नेपाली कागज उद्योगका उत्पादनको गुणस्तरमा जोड दिनुभयो ।
नेपाल वनस्पती घ्यू तथा तेल उत्पादक संघका अध्यक्ष विकास दुगडले निर्यात र राजस्वमा समेत ठूलो योगदान दिएका घ्यू तथा तेल उद्योगहरुका वारेमा गरिएका हल्का टिप्पणीका कारण करोडौं, अरवौंको लगानीमा संचालन भएका उद्योगहरुलाई चित्त दुखाउने काम गरेको दुखेसो गर्नुभयो ।
कार्यक्रममा महासंघका पदाधिकारीहरु, कार्यकारिणी समितिका सदस्यहरु, वस्तुगत परिषद्का उपसभापतिहरु, विशेष आमन्त्रितहरु, सल्लाहकारहरु, निवनिर्वाचित पदाधिकारीहरु, उद्यमी व्यवसायीहरुको उपस्थिति थियो ।
