Jan 06, 2019
नेपाल उद्योग वाणिज्य महासंघका विशिष्ट सदस्य एवं पूर्व अध्यक्ष चण्डिराज ढकालले मुलुकमा दुई तिहाई बहुमतको सरकार गठन भएको नौ महिनासम्म पनि मुलुकमा समृद्धिको अनुभुति हुन नसकेको बताउनु भएको छ ।
रिपोटर्स क्लव नेपाल प्रदेश नम्वर ५ दाङले आज दाङको तुलसीपुरमा आयोजना गरेको साक्षात्कार कार्यक्रममा बोल्दै विशिष्ट सदस्य ढकालले सो कुरा बताउनु भएको हो । मुलुक कम्तिमा २० बर्ष अन्यौलको वातावरणमा रहँदा पनि व्यवसायीहरूले कहिल्यै हौसला नगुमाएर मुलुकलाई गतिशिल बनाउन लागिपरेको स्मरण गर्दै पूर्व अध्यक्ष ढकालले अन्यौल र अस्थिरतामा पनि व्यवसायीहरू हतोत्साहित नभएको स्पष्ट पार्नुभयो ।
गुजारामुखी अर्थतन्त्रलाई प्रतिस्थापन गरी निर्यातमुखि अर्थतन्त्रको विकास भएमात्र मुलुकमा आर्थिक समृद्धिको लक्ष हासिल हुने उहाँले बताउनुभयो । ‘लगानीमैत्री वातावरण सरकारले बनाइदिनुपर्यो, त्यसमा हातेमालो गर्न हामी सम्पूर्ण व्यवसायीहरू तयार छौं’-विशिष्ट सदस्य एवं पूर्व अध्यक्ष ढकालले भन्नुभयो, सरकारले व्यवसायीहरूलाई हतोत्साहित होइन, उर्जाशिल बनाउन आवश्यक छ ।
साक्षात्कार कार्यक्रममा बोल्दै महासंघका उपाध्यक्ष किशोरकुमार प्रधानले दुई तिहाई वहुमतको सरकारबाट व्यवसायीहरूले आर्थिक समृद्धिको धेरै आशा गरेको बताउंदै समृद्धिको न्यानो ताप अझै पाई नसकेको बताउनु भयो । ‘अझै पनि आशावादी छौं, हतोत्साहि भएका छैनौं, तर राज्यले देखिने खालका अर्थपूर्ण आर्थिक समृद्धिको अभियान चालोस भन्ने शुभ-कामना दिन चाहान्छौं’-प्रधानले भन्नुभयो । साथै उहा“ले समृद्धिको यो अभियानमा दाङका पूर्वपश्चिम र उत्तरदक्षिणमा रहेका धार्मिक धरोहरहरूले आशिर्वाद प्रदान गरून भन्ने कामना पनि गर्नुभयो ।
महासंघका उपाध्यक्ष चन्द्र प्रसाद ढकालले दाङमा एग्रो इन्डष्ट्रिजको प्रशस्त सम्भावना रहेको उल्लेख गर्दै, त्यसको वातावरण बनाइदिन स्थानिय सरकारलाई आग्रह गर्नुभयो । ‘यहाँ कृषिजन्य उद्योगको भरपुर सम्भावना छ, यद्धपि खुर्सानिदेखि बेसारसम्म पनि उल्लेख्य रूपमा आयात भैरहेको देखिन्छ, यसलाई कृषिजन्य उद्योगले समन्वय गर्न सक्छ’-उपाध्यक्ष ढकालले भन्नुभयो । त्यसैगरी यहा“का नदिनाला र प्राकृतिक स्रोतबाट पनि आयआर्जन गर्न सकिने प्रसस्त संभावना रहेको पनि उहाँले प्रस्ट पार्नु भयो ।
कार्यक्रममा महासंघको प्रदेश नम्वर ५ का अध्यक्ष गुणनिधि तिवारीको पनि उपस्थिति रहेको थियो ।
