नेपाल उद्योग वाणिज्य महासंघको पहलमा सुनचाँदी व्यवसायीहरुको आन्दोलन स्थगित गरिएको छ । नेपाल राष्ट्र बैंकले सुन कारोवारमा लिएको नयाँ नीतिको विरोधमा नेपाल सुनचाँदी व्यवसायी संघले सुनचाँदी कारोवारलाई विगत केही दिनदेखि बन्द गर्दै आएको थियो । राष्ट्र बैंकले गत शुक्रवार नयाँ निर्देशिका जारी गर्दै सुनचाँदी व्यवसाय संघ सहित अन्य नेपाल रत्न तथा आभुषण संघ तथा नेपाल सुनचाँदी कला व्यवसायी संघलाई पनि आयात गरेको सुनलाई खरिद गर्नका लागि सिफारिस गर्न पाउने व्यवस्था गरेको थियो ।
महासंघले विगत केही दिनदेखी सुनचाँदी व्यवसायीहरुको समस्या समाधानका लागि आफनो तर्फबाट पहल गर्दै आएको र सोही विषयमा आज महासंघ सचिवालयमा नेपाल सुनचाँदी व्यवसायी संघ, नेपाल रत्न तथा आभुषण संघ, नेपाल सुनचाँदी कला व्यवसायी संघ र नेपाल हस्तकला महासंघको बैठकबाट सुनचाँदीको व्यवसाय व्यवस्थित गर्न नेपाल सुनचाँदी व्यवसायी संघको संयोजकत्वमा नेपाल रत्न तथा आभुषण संघ र नेपाल सुन चाँदी कला व्यवसायी संघका अध्यक्षहरु समेत रहेको "सुन चाँदी व्यवस्थापन संयन्त्र" निर्माण गरी सोही संयन्त्र मार्फत यस क्षेत्रका यावत विषयलाई सम्पादन गर्ने सहमती भएको छ ।
सो सम्बन्धमा आज महासंघ सचिवालयमा एक सहमतीपत्रमा हस्ताक्षर समेत भयो । महासंघका अध्यक्ष कुशकुमार जोशीको उपस्थितिमा महासंघका उपाध्यक्ष भाष्करराज राजकणिर्कार तथा नेपाल हस्तकला व्यवसायी महासंघका अध्यक्ष विकास रत्न धाख्वाको रोहवरमा सहमतीपत्रमा तीनै संस्था क्रमशः नेपाल सुनचाँदी व्यवसायी संघका अध्यक्ष तेजरत्न शाक्य, नेपाल रत्न तथा आभुषण संघका अध्यक्ष रमेश महर्जन र नेपाल सुनचाँदी कला व्यवसायी संघका अध्यक्ष रुद्र बहादुर बराइलीले हस्ताक्षर गर्नुभयो ।
सो सहमतीपत्र यस प्रकार छः
नेपाल उद्योग वाणिज्य महासंघको सचिवालयमा महासंघका उपाध्यक्ष श्री भाष्करराज कणिर्कारको अध्यक्षतामा आज २०६७ भदौ ९ गते तपसीलका महानुभावहरुको उपस्थितिमा एक संयुक्त वैठक बस्यो । वैठकले निम्नानुसारको निर्णय गर्योः
१. सुन चांदी व्यवसायीलाई व्यवस्थित, मर्यादित र पारदर्शी बनाउन संयुक्त रुपमा कार्य अघि बढाउने उद्देश्यका लागि सामूहिक रुपमा अघि बढ्न प्रतिवद्धता व्यक्त गरियो ।
२. सुन चांदीको व्यवसाय व्यवस्थित गर्न नेपाल सुन चांदी व्यवसायी संघको अध्यक्षको संयोजकत्वमा नेपाल रत्न तथा आभुषण संघ र नेपाल सुन चांदी कला व्यवसायी संघका अध्यक्षहरु समेत रहेको "सुन चांदी व्यवस्थापन संयन्त्र" स्थापित गर्ने ।
३. सुन चांदीको व्यवसायलाई व्यवस्थित बनाउन यस संयन्त्रले सुन चांदी व्यवसाय सम्बन्धमा एक वृहत कार्यविधि निर्माण गरी सोको अधिनमा रही यो संयन्त्रले आफ्नो कार्य सम्पादन गर्नेछ ।
४. संयन्त्रको सचिवालय नेपाल सुन चांदी व्यवसायी संघमा रहने र सदस्य सचिवका रुपमा नेपाल सुन चांदी व्यवसायी संघको महासचिव रहने ।
५. यस संयुक्त संयन्त्रले नेपाल सरकार, नेपाल राष्ट्र वैंक लगायत सवै निकाय र इकाईहरुमा सवै सुन चांदी व्यवसायीहरुको संयुक्त प्रतिनिधित्व गर्नेछ ।
६. यस संयन्त्रले नै दैनिक रुपमा सुन चांदीको भाउ तोक्ने र वितरण प्रणाली पनि व्यवस्थित गर्नेछ ।
७. सुन चांदीको बजारलाई खुला गर्दै लैजान आवश्यक नीति नियम तर्जुमा गर्न सरकारलाई सघाउने र कोटा बढोत्तरी आवश्यक भएमा सोका लागि पहल गर्नेछ ।
८. निर्यात प्रयोजनका लागि आवश्यक सुन चादीको अतिरिक्त कोटाका लागि नेपाल राष्ट्र वैंकमा नेपाल हस्तकला महासंघको पहललाई संयुक्त संयन्त्रले सहयोग गर्नेछ ।
९. हाल नेपाल सुन चादी व्यवसायी संघले आव्हान गरेको आन्दोलनलाई स्थगित गरी "संयन्त्र" ले तय गर्ने संयुक्त माग सहित नेपाल उद्योग वाणिज्य महासंघको पहलमा नेपाल रत्न तथा आभुषण संघ र नेपाल सुन चादी कला व्यवसायी संघ समेतको संयुक्त प्रयासमा आन्दोलनले सम्बोधन गर्न खोजेको मागहरुलाई सम्बन्धित निकाय मार्फत पूरा गराइने सहमति समेत गरियो ।
सहमतीपत्र हस्ताक्षर कार्यक्रममा महासंघका अध्यक्ष जोशीले निजी क्षेत्र एक भएमा जस्तो सुकै समस्या समाधान पनि सजिलै हुने उदाहरण यस्ले दिएको वताउंदै संयन्त्र मार्फत यस क्षेत्रलाई अझ बढी व्यवस्थित र पारदर्शी वनाएर जान सहज हुने विश्वास दिलाउनु भयो ।
महासंघका उपाध्यक्ष राजकणिर्कारले सरकारको नीतिका कारण सुनचाँदी व्यवसायमा देखा परेको समस्या समाधान सहित यस क्षेत्रको विकासका लागि व्यवसायिक संस्थाहरु बीच भएको सहमती कोशेढुंगा हुने विश्वास प्रकट गर्नुभयो ।
सो अवसरमा नेपाल हस्तकला महासंघ र सहमतीपत्रमा हस्ताक्षर गर्ने तीनै वटा संस्थाका अध्यक्षहरुले यो सहमती सुनचाँदी व्यवसायलाई व्यवस्थित पार्ने एककदम विकसित सफलता भएको बताउनु भयो ।
